पार्टीलाई मजबुत बनाउन काँग्रेस जिल्ला सभापतिको छलफल

E Naya Khabar Reporter २०७४ माघ ६ गते शनिवार | Big News, मुख्य समाचार

 

 

 

भक्तपुर, : प्रतिनिधि सभा र प्रदेश सभाको निर्वाचनमा ठूलो पराजय भोगे पछि नेपाली काँग्रेस पार्टीलाई मजबुत बनाउनका लागि प्रदेश नं ३ का काँग्रेस पार्टी जिल्ला सभापतिले छलफल शुरु गरेका छन् ।
स्थानीय तह, प्रदेशसभा र प्रतिनिधिसभाको निर्वाचन सम्पन्न भइसकेका अवस्थामा निर्वाचनको समीक्षा गर्दै पार्टीलाई कसरी मजबुत बनाउने भन्नेबारेमा जिल्ला सभापतिबीच छलफल भएको काँग्रेस भक्तपुर जिल्ला सभापति दुर्लभ थापाले जानकारी दिनुभयो ।
उहाँले भन्नुभयो, “ हालै सम्पन्न तीन वटै तहको निर्वाचनको समीक्षा गर्दै निर्वाचनमा पार्टीको कहाँ कहाँ के कमजोरी भए, कमजोरीलाई कसरी सुधार्दै लैजाने, संगठन र पार्टीलाई कसरी बलियो तथा मजबुत बनाउने भन्नेबारेमा छलफल भएको हो ।”

जिल्ला सभापति वा पार्टीका कुनै गुट वा उपगुटको भेला नभई पार्टीलाई बलियो बनाउनेबारे जिल्ला सभापतिको छलफल भएको उहाँको भनाइ थियो । छलफलमा सभापतिहरु भक्तपुरका दुर्लभ थापा, काठमाडौँका सबुज बानियाँ, रसुवाका पेम्बा छिरिङ, मकवानपुरका इन्द्र बानियाँ, सिन्धुलीका उज्ज्वल बराल, रामेछापका लवश्री न्यौपाने, दोलखाका रुद्रबहादुर खड्का, सिन्धुपाल्चोकका विकास लामा, नुवाकोटका जगदीशनरसिंह केसी र काभ्रेपलाञ्चोकका मधु आचार्यको सहभागिता थियो ।

ललितपुरका सभापति क्यानडामा रहेको तथा चितवन र खोटाङका जिल्ला सभापति भने व्यस्तताका कारण छलफलमा सहभागी नभएको बताइएको छ । यही माघ ७ गते खोटाङ हलेसी महादेवको दर्शन गर्दै देशभरका सम्भव भएसम्मका काँग्रेस जिल्ला सभापतिहरु सहभागी भएर पार्टीलाई मजबुत बनाएर लैजानेबारेमा हलेसीमा छलफल हुने र यस्ता छलफललाई निरन्तरता दिनेबारे जिल्ला सभापतिबीच सहमति भएको भक्तपुर सभापति थापाले जानकारी दिनुभयो । भक्तपुरको बाग्मति क्लबमा छलफल आयोजना गरिएको थियो ।

95 पटक हेरिएकाे
Top